Salt - Leið samkenndar og vakandi athygli

SALT er leið til sjálfsþekkingar sem byggir á búddískri kennslu og hugleiðslu, samkennd, djúpum skilningi og sátt. Leið sem hjálpar okkur að sjá skýrt og verða meðvituð um hið ómeðvitaða. Þannig getum við tekist á við erfiðar tilfinningar og hugsanir sem valda okkur vanlíðan og koma í veg fyrir að við döfnum í lífi og starfi.

Það er mikill umbreytingarkraftur fólginn í því að sjá það sem er, skoða það með einlægum og opnum huga og sleppa því svo í mildi og kærleika.

​Markmiðið er vitundarvakning - að losna undan oki hugsana og tilfinninga og vera ekki lengur undir þeirra stjórn. Læra að treysta lífinu, sem kann að lifa og lifa heil og í sátt.

S er að sjá stundina eins og hún er núna og meðtaka í einlægni eigin: hugsanir, tilfinningar, viðhorf og hegðunarmynstur - lífið eins og það birtist núna.

​Að sjá skýrt krefst einlægni og heiðarleika og er fyrsta skrefið í átt að hamingjusamara lífi, betri og heiðarlegri samskiptum við sjálfan sig og aðra.​

A er að athuga og veita athygli. Hvað liggur að baki? Staldra við og horfast í augu við sjálfan sig og sjá djúpt. Vera óhrædd við að spyrja spurninga, fara að en ekki frá.
​
​Í ferðalagi sem þessu er nauðsynlegt að hafa mildi, skýrleika og húmor að leiðarljósi. Slíkt leiðarljós lýsir upp skúmaskot hugans sem mörg hver hafa aldrei verið lýst upp.

L er að leyfa. Þegar þú hefur horft djúpt og séð skýrt er kominn tími til að sleppa tökunum, finna sáttina og leyfa stundinni að vera eins og hún er. Sleppa bæði spurningunni og svarinu og beina athyglinni í staðinn að andardrættinum, líkamanum og því sem er að gerast akkúrat núna.

​Finna að þessi stund er eins og hún er, ekki eins og þér finnst hún eigi að vera. Finna hvernig það er að vera þú hér og nú og meðtaka án þess að dæma.

T er að treysta. Sleppa takinu og leyfa stundinni að vera eins og hún er - finna sáttina. Treysta stundinni fyrir þér, gefa þig lífinu á vald og treysta því að lífið kunni að lifa. Smám saman finnst okkur eðlilegra að treysta lífinu frekar en hugmyndum okkar um lífið. Þetta traust þarf að byggja upp með iðkun og æfingum í mildri og skýrri vakandi athygli.

Að koma á stefnumót við lífið og uppgötva að hamingjan er þegar hér í þessum andardrætti, í þeim næsta…

SALT hjálpar okkur að nálgast lífið á opinn og heiðarlegan hátt.

1. Lífið kann að lifa - Treystu innsæinu, vertu skapandi. 
2. Lífið er óútreiknanlegt - Vertu opin(n) og forvitin(n). 
3. Allt er í heiminum hverfullt - Leitaðu skjóls í hverfuleikanum.
4. Þessi stund á sér hvorki útskýringu né ástæðu - Lærðu að taka ábyrgð á þínum aðstæðum.
5. Lífið er eins og það er akkúrat núna - Lærðu að sjá í gegn um þínar hugmyndir um lífið.
6. Þú ert ekki það sem þú heldur að þú sért - Finndu hugrekkið til að sleppa tökunum og mæta sjálfum þér í mildi, skýrleika og húmor.
7. Uppspretta lífsins er hreinn kærleikur - Afhjúpaðu kærleikann í lífinu.

​-Ástvaldur Zenki